ҚР Президенті Қасым-Жомарт Тоқаев 2025 жылды «Жұмысшы мамандықтар жылы» деп жариялады. Бұл еліміздің экономикалық және әлеуметтік дамуы үшін маңызды қадам болды. Жұмысшы мамандықтары экономиканың дамуына, жұмыссыздықты азайтуға және өндірістік-техникалық саланың ілгерілеуіне тікелей әсер етеді.
Осы бастаманы қолдаған «Samruk-Green Energy» ЖШС 2025 жылдың 18 қыркүйегінде Қонаев қаласындағы Д.А. Қонаев атындағы жалпы білім беретін мектептің оқушыларымен кездесу өткізді. Іс-шара Қонаев қаласындағы қуаты 2 МВт күн электр станциясының аумағында өтті. Лектор ретінде станция басшысы Жакитов М.С. шығып, жаңартылатын энергия көздері саласындағы білімі мен тәжірибесімен бөлісті.
Неліктен жаңартылатын энергетика – тек болашақ емес, сонымен бірге бүгінгі күннің талабы?
Қазіргі таңда әлем біртіндеп көмірден, мұнайдан және газдан бас тартып жатыр. Адамзат тұрақты, қауіпсіз әрі экологиялық таза энергия көздерін іздеуде. Қазақстан бұл үрдістен тыс қалмай, ондаған күн және жел электр станцияларын салып, жаңа жобаларды іске асыруда.
Алайда ешбір станция мамандарсыз жұмыс істемейді. Бүгінгі күні күн электр станцияларында инженерлер мен басшылардан бөлек, жұмысшы мамандықтары аса қажет: панельдерге, кабельдерге және қалқандарға қызмет көрсететін электриктер, энергетикалық жабдықтарды орнату және техникалық қызмет көрсету мамандары.
Бұл – колледжді немесе университетті тәмамдағаннан кейін игеруге болатын, әрдайым сұранысқа ие мамандықтар. Ең бастысы – олар елімізде «жасыл» энергетиканы дамыту миссиясымен тығыз байланысты.
Бүгін не істеуге болады? Оқып-үйрену, техникаға қызығушылық таныту, физика мен математикадан қорықпау, сұрақ қою. Сала өкілдері мектеп оқушыларын қолдауға, тәжірибесімен бөлісуге, станцияларға экскурсия ұйымдастыруға және кәсіби бағдар беруге дайын.
Жұмысшы мамандықтары – бұл кешегі күннің емес, ертеңнің мамандықтары. Олар тұрақты жұмыс қана емес, еліміздің энергетикалық және экологиялық қауіпсіздігіне қосқан зор үлес болып табылады.
